Кітап адам өмірінде аса маңызды рөл атқарады. Кітап елді сүюге, талапты, кішіпейіл болуға, мейірімділікке, төзімділікке баулиды. Кітап жаман әдеттерден аулақ болуға шақырады. Кітапты біздің қоғамымыздың әрбір адамы күнделікті тұрмысында қолданады.

Одан ақыл – кеңес, тәлім – тәрбие, үлгі - өнеге алады. Кітап – біздің рухани жан азығымыз.

 «Кітап – ғалым, тілсіз мұғалім» деп тегін айтылмаған ғой.  Кітап – ғылым, білім жемісін халық арасына жаюшы, таратушы. Кітап – ақылдың кені.

Кітапта алма ағашы,

Жемісін біздер теретін.

Тәтті алмаға балашы

Кітабыңның әр бетін,-деп Музафар Әлімбаев атамыз жырлағандай әдеби кітаптар мен оқулықтар – сендерге білім көзі, рухани қазына. Дана халқымыз «Батыр бірді жығады, білім мыңды жығады» деп бекер айтпаса керек.

  Қазіргі таңда орталықтандырылған кітапхана   қоры  неше алуан түрлі жанырда жазылған кітаптармен жыл сайын  толықтырылып отырады. Әдебиет таңдау барысында кітапхана оқырмандарының сұранысы ескеріледі. Кітапхана қорында көптеген қызықты кітаптар бар.  Саран қалалық орталық кітапханасының  балалар бөлімі  жүзден аса кітаптармен толықты, бұдан бөлек оқу залы мен үлкендер абонементіне де көптеген қызықты кітаптар келіп жетті. Детектив, роман, драма, фантастика, психология, шытырман оқиғалар немесе ертегілер әлеміне сапар шегіп, өзіңізге күні бойыға позитивті энергия алыңыздар.  Кітаптар мемлекеттік тілде және орыс тілінде басылып шығарылған.

   Иә, кітап – қоғамның рухани күштерін дамытудың қуатты құралы, мәдениеттің қайнар бұлағы, оның өзекті саласының бірі. Рухани мөлдірліктің, биік парасаттың, асқақ адамгершіліктің, арқалы ойдың қоймасы. Кітап арқылы біз өткенге көз жібереміз, одан қымбат мұра жинаймыз, тәжірибеге кенелеміз. Құрметті Саран қаласының тұрғындары сіздерді кітап оқуға шақырамын.

А.Мусина, Саран қаласының орталықтандырылған кітапханасының балалар бөлімінің кітапханашысы