30 шілде – Саран жамағаты үшін айтулы күндердің бірі болды. Себебі дәл сол күні көптің тілеуі қабыл болып, жаңа мешіттің алғашқы қазығы қағылды.

Игі шараға Қарағанды облысының бас имамы Естай Әбдіғали, қалалық мешіттің имамы Нұржігіт Оразалыұлы, қала және кент имамдары,  қазыналы ақсақалдар мен ақжаулықты әжелер, жаны жайсаң жомарт жандар қатысты. Құран оқылып, ел-жұртқа береке-бірлік тілеп, жиналған қонақтардың ізгі лебізі тыңдалды. Қуаныш пен жақсылықтың нышаны ретінде шашу шашылды.

- Өздеріңіз жақсы білетіндей, Саран қаласында Аллаға шүкір қазіргі таңда бір мешіт өзінің жұмысын жүргізіп келеді. Одан бөлек, міне, Аллаға шүкір, бірі қаланың ішінен болса, бірі енді қаланың сыртынан бой көтергелі тұр... Арнайлатып мешіт салу – бұл мұсылмандық парызымыз деп есептеуге болады, - дей келе Қарағанды облысының бас имамы Естай Әбдіғали ескі мешіттің жұмысы тоқтап қалмайтынын жеткізді.

 Ал Рабочая көшесінің бойында сыйымдылығы 1000 адам болатын, екі қабаттан тұратын заманауи мешіт салынбақ. Оның бірінші қабатында 400 адамға арналған асхана болса, екінші қабатында үлкен  намазхана, имамдардың бөлмесі, құран оқитын бөлме мен жиын залын істеу қарастырылған.

- Мешіт салу – сауабы үзілмейтін сауапты іс. Осы істе бірлік, таза ықылас пен ақ ниет қажет. Игі іске Саран жамағатын бір адамдай атсалысуға шақырамын, - деп атап өтті қалалық мешіттің имамы Нұржігіт Мұсабеков.

Жаңа мешіттің құрылыс жұмыстарын тамыз айында бастау жоспарланған.

Дина ӘБДІҒАЛИЕВА