Өлең - сөздің патшасы, сөз сарасы,

Қиыннан қиыстырар ер данасы.

Тілге жеңіл, жүрекке жылы тиіп,

Теп-тегіс жұмыр келсін айналасы.

Абай Құнанбайұлы

10 тамыз – ұстаз, ақын, ағартушы, философ, сазгер, аудармашы Абай Құнанбаевтың  туғанына 180 жыл толады. Осы күнге орай Ақтас кентінің мәдени-сауық орталығының ұжымы бірінші рет «Әлем таныған ұлы Абай» атты әдеби керуен өткізді. Ашық аспан астында өткен шараға кент тұрғындары қатысты.

Әдеби керуен аясында Абайдың өмірбаянынан бастап, оның шығармашылығына ерекше зер салынды. Тұрғындар кемеңгер ойшылға қатысты ой-пікірін білдіріп, сүйіп оқитын шығармаларымен бөлісті. Ұйымдастырушылар, мұндай шаралар қазақ халқының әдеби мұрасын дәріптеп қана қоймай, рухани қазынаны байытуға үлес қосатының айтып отыр. Себебі, оған тек аға буын өкілдері ғана емес, жастар да өз тарапынан белсенділігін көрсетті.

- Ұлы ақын, кемеңгер ойшыл Абай Құнанбаевтың 180 жылдығына орай кентіміздің тұрғындары арасында ашық аспан астында көше сұхбаты ұйымдастырылды. Кездейсоқ кездескен тұрғындарға Абай жайлы сұрақтар қойылып, олар өз пікірімен ашық бөлісті. «Абайды тану – өзіңді тану!» демекші, бұл іс-шара — тек сұхбат емес, көше сұхбатының басты мақсаты — Абай әлемін халық жүрегіне жақындату және халықпен рухани байланыс орнату болды, - деп атап өтті Ақтас кентінің мәдени-сауық орталығының балалар, жасөспірімдер және жастармен жұмысы бойынша әдіскері Нүрзия Фаттахова.

Бұл іс-шарадан бөлек, 4 тамыз күні Ақтас кентінің мәдени-сауық орталығында  «Якташлар» татар-башқұрт этномәдени бірлестігінің мұрындық болуымен «Абайдың ұлы мұрасы» атты әдеби-музыкалық кеш өтті. Ақынның танымал өлеңдері орындалып, әндері шырқалды. Терең философияға толы поэзиясы талқыланды. Сондай-ақ, ақынның туған күніне қарсы Абай Құнанбайұлына арнап үш тілде бейнежазба жарияланды.  Алдағы күндері ақынның 180 жылдығына және Халықаралық жастар күніне орай 44803 әскери бөлімінде диалог алаңын ұйымдастыру жоспарланып отыр.

Дина ӘБДІҒАЛИЕВА