1 тамыздан бастап қаламыздың табиғатын көркейтуге бағытталған «Жасыл ел» еңбек жасағының үшінші маусымы өз жұмысын бастады.

Биыл жазғы демалыс уақытында жастарды жұмыспен қамту, еңбексүйгіштікке баулу және қаланы абаттандыру мақсатында еңбек жасағына 220 жасты тарту жоспарланған. Оның екі маусымы сәтті аяқталып, енді жаңа үшінші құрам өз жұмысына кірісті.

- Екі маусымның қорытындысы бойынша  3000-ға жуық қоқыс-қалдық салынған қап жиналды. Әр  маусымда 73 бала жұмыс істейді. 14-15 жас аралығындағы балалар 4 сағаттан, 16 жастан асқан балалар күніне 6 сағат жұмыс істейді. Олармен бірге екі координатор жұмыс жасайды. Балалардың қызығушылығы өте жақсы. Ең бастысы – бұл жерден достар табады. Мысалы, екінші маусым аяқталғанда балалар өздері ойын ұйымдастырып, бір-бірімен қоштаспай, «Келесі кездескенше»,- деп кетті. Осы үшінші маусымда да балалар дәл сондай қарым-қатынаспен бір-бірімен достасып кетеді деген ойдамыз, - деді қалалық жастар ресурстық орталығының психологы Айым Қанапиянова.

Қоршаған ортаға жанашыр жастардың жұмыс күні таңғы тоғыздан басталады.  Сенбі мен жексенбі күндері демалады. Қалған күндері тазалық жұмыстарын жүргізіп, қаланың ажарын аша түсу үшін атсалысуда. Сондай-ақ, Саран қаласының жастар ресурстық орталығы қалалық тұрғын үй-коммуналдық шаруашылығы, жолаушылар көлігі, автомобиль жолдары және тұрғын үй инспекциясы бөлімімен тығыз жұмыс істеп келеді.

 Алдағы уақытта Саран су қоймасының маңайын шашылып жатқан қоқыс-қалдықтардан тазарту жоспарлануда. 

 Дина ӘБДІҒАЛИЕВА