Бір жолды таңдап, бір әулеттің шежіресін өріп келе жатқан тәжірибелі кенші Бауыржан Смагулов үшін Кеншілер күні ең жылы әрі маңызды мерекелердің бірі. Көзді ашып-жұмғанша бұл салада жүргеніне де 30 жылдан асыпты.
Ол Саран қаласында дүниеге келіп, осы қалада білім алған. Жастайынан қандай салаға бет бұратынын, өмірін қай бағытқа арнайтынын да білген. Себебі...
- Мен Саран қаласының тумасымын. Көп балалы отбасыдан шыққанмын. Үйдің үлкенімін. Соғыс уақытында атам - Смагулов Далельхан Смағұлұлы №106 шахтада жұмыс істеген, әкем - Смагулов Каиртай Далельханұлы «Саранская» шахтасында еңбек етті. Туысқандарымыздың басым көпшілігі - кенші. Мен және менің інім - Мұхит Смагулов «Саранская» шахтасында жұмыс істейміз. Бұл жерден дос таптым, жаны жайсаң жандармен таныстым,- деп кейіпкеріміз әңгімесін бастап берді.
Бауыржан Каиртайұлы талай дарынды түлектерді түлетіп ұшырған №2 жалпы білім беретін мектепте 8-сыныпқа дейін білім алып, кейін жоғары сыныбын №17 мектеп-гимназиясында жалғастырған. Мектеп қабырғасында оқып жүргенде сыныптастарымен «Сокурская» шахтасының маңайында ойнап жүріп, шахтада жұмыс істеуді армандаған. Оның айтуы бойынша, сол уақатта басқа жұмысты көз алдына елестете алмаған. 1988 жылы СПТУ-4-ті (қазіргі СТК-ны) «Жерасты электр слесарі және үңгуші» мамандығы бойынша тәмамдап, арманына бір қадам жақындай түскен.
- 1988 жылы «Сокурская» шахтаға жұмысқа орналастым. Кейін жұмыс орнымды ауыстырдым. Қазір «Саранская» шахтасында жерасты тау-кен жұмысшысы болып жұмыс істеп келемін. Биыл - 22 жыл болады. Ал жалпы жер астында жүргеніме - 30 жылдан асты. Менімен бірге бес сыныптасым еңбек етуде. Бала арманымыз орындалды десек те болады,-деп езу тарта толықтырып кетті Бауыржан Смагулов.
Білікті кеншінің 800 метрдей жер астына түсіп жұмыс істеуге әбден еті үйренген. Алдына қойған мақсатқа жету жолында талай маңдай тер төгілді. Бүгінде адал еңбектің жемісін көріп келеді.
- Біз ауысыммен жұмыс істейміз. Жұмысқа арнайы автобуспен барамыз. Жұмыс киімімізді киіп, жер астына түсіп, өзіміздің жұмыс орнымызға асығамыз. Жер астында алты сағат болып, басқа ауысымдағы жігіттер келіп, бізді алмастырады. Жұмысымыз оңай емес. Жас кезімізде үйрене алмай жүрдік. Ал қазір өзімді басқа жұмыстан мүлдем көрмеймін. Кенші кәсібі - өмірімнің мәні. Бірге жұмыс істейтін әріптестерім де жақсы. Олардың әрқайсысына зор денсаулық, мол бақыт тілеймін, - деп өз жұмысы туралы тебірене айта отырып, әріптестеріне тілегін жеткізді.
Оның әр сөзінде мамандыққа деген адалдық және шексіз сүйіспеншілік сезіледі. Ол тек тәжірибелі кенші ғана емес, асыл жар, ардақты әке, мейірімді ата. Бүгінде Кеншілер күнін жанұя ортасында тойлау - отбасылық дәстүрге айналды. Кәсіби мерекеде аяулы жары Гульмира Смагулова ақ дастарқанын жайнатып жібереді. Ең ізгі тілектер айтылады.
Ауыр жұмысты еңсеріп жүру оңай емес. Бауыржан Смагуловтан: «Сіз үшін бақыт деген не?» деп сұрағанда, «Аспанымыз ашық, еліміз тыныш болса, отбасым, жақындарым аман болса – мен үшін осыдан артық бақыт жоқ»,- деп бір ауыз сөзбен қайырған болатын. Себебі жанұя жылулығы, немерелердің улап-шулап ойнап жүгіргені шаршағанды ұмыттырады, жүректі тыныштандырады, жанға жайлылық, көңілге қуаныш ұялатады.
Дина ӘБДІҒАЛИЕВА
