Халықаралық жастар күніне орай Саран қалалық мәслихатының төрағасы Өміржан Баймағанбетов  мәдениет үйіннің «Сoworking» орталығында ел намысын қорғап жүрген жеңімпаздармен, дүлдүл жобалардың жүлдегерлерімен және қаланың дамуына сүбелі үлес қосып жүрген белсенді жастармен кездесті.

Шарада салтанатты түрде грек-рим күресінен Қазақстан Республикасының чемпионы, Азия чемпионы, халықаралық дәрежедегі спорт шебері, Саран қаласының балалар мен жасөспірімдердің мамандандырылған олимпиадалық резерв мектебінің шәкірті Ибрагим Магомадов, 44803 әскери бөлімінің, С-300 зениттік зымырандық дивизион командирінің тәрбие және идеологиялық жұмыс жөніндегі орынбасары, майор Рамазан Бахтияров, қалалық газеттің бас редакторы, мәслихат депутаты Бибігүл Майпасова Қарағанды облысы әкімінің орынбасары Ә.Әлденейдің атынан Алғыс хатпен марапатталды.

Кездесу барысында қалалық мәслихаттың төрағасы Өміржан Зейнешұлы өзінің балалық шағымен, жүріп өткен жолымен бөлісті. Жастармен әртүрлі тақырып аясында пікір алмасып, ұсыныстарын тыңдап, еркін форматта сұхбат жүргізді.

-              Ең басында  - адамның адамгершілігі болуы керек. Қандай жағдай болмасын, бір қалыпта болып, өзгермей, бірін-бірі сыйлап, шама келгенше жақсылық жасауға тырысу керек, сонда өзіне де, өзгеге де жақсы қарым-қатынас болады... Адал қызмет етіп адал жүрсеңдер, адал болсаңдар – ел де, халық та қолдайды, - деді  қалалық мәслихаттың төрағасы.

Сондай-ақ, жастарды дұрыс өмір сүру салтын ұстануға шақырып, спортпен айналысқан адам күндікке сергек, дені сау болатынын атап  өтті. Қатысушылар тарапынан да қызықты сауалдар қойылды. Кездесу соңында, жастар өз әсерімен бөлісіп, жақсы көңіл-күйде тарқасты.

Дина ӘБДІҒАЛИЕВА