12 тамыз күні «Таза Қазақстан» жалпыұлттық экологиялық акциясы аясында Саран қаласында 10 мың  пластикалық бөтелке жиналып, 2000 балмұздақ таратылды.

Экологиялық акция қоршаған ортаның тазалығына, табиғатқа қамқорлық жасауға бағытталған.  Кем дегенде бес пластикалық бөтелке әкелген әрбір адамға балмұздақ берілді. Тазалық үшін күресте балалар мен жастар өте белсенді болды. Бөтелкелерін қапқа, дорбаға салып арнайы қойылған қабылдау пунктерге тапсырды. Әр бес бөтелкеге талон беріліп, соның санына сәйкес балмұздақтар таратылды.

- Бүгін жанұямызбен бірге эко-акцияны қолдап келдік. Балаларымыз да бізбен келді. Жиырма бөтелке тапсырдық, - деді Саран қаласының тұрғыны Гальгуна Валиева.

Мұндай акциялар экологиялық мәдениетті қалыптастыруға зор септігін тигізеді дейді ұйымдастырушылар.

- Бұл акция Қарағанды облысының табиғи ресурстар және табиғат пайдалануды реттеу басқармасының жобасын іске асырып жатыр. Ол «Бөлу, тапсыру, қайта өңдеу» жобасы деп аталады. Сол жоба аясында Қарағанды  облысында екі акция өткізу көзделген. Біреуін Майқұдықта өткіздік. Осы жолы Саран қаласының әкімдігімен бірлесіп Саран қаласында өткізуді ұйғардық. Негізгі мақсаты – халық арасында экологиялық мәдениетті қалыптастыру, -деді «Қарағанды облысының Жұмысшы жастар одағы» ҚБ төрағасының орынбасары Нұркелді Омарханов.

Акция сағат 10:00-де басталып үш сағатқа созылды. Оған 800 адам қатысып, 10 мың пластикалық бөтелге тапсырды.

Дина ӘБДІҒАЛИЕВА