Саран қаласында жылдың басты спорттық оқиғалардың бірі -  «Арай-2025»  XVIІI облыстық жазғы спартакиадасы ұйымдастырылды.

Қалалық «Сұңқар» стадионында жазғы спартакиаданың ашылу және жабылу салтанаты өтті. Ашылу салтанатында Саран қаласы мәслихатының төрағасы  Өміржан Баймағанбетов, Қарағанды облысының дене шынықтыру және спорт басқармасының басшысы Серік Сәпиев, спартакиаданың бас төрешісі  Қайрат Омаров құттықтау сөз сөйлеп, қатысушыларға сәттілік тіледі.

13-15 тамыз аралығында өткен байрақты бәсекеде Қарағанды, Теміртау, Абай,  Шахтинск, Балқаш және Саран қалаларынан келген 500-ге жуық спортшы қатысты. Олар қол күрес, волейбол, қазақ күресі, жеңіл атлетика, үстел теннисі, шағын футбол, жазғы Президенттік көпсайыс, кір тасын көтеру, тоғызқұмалақ, шахмат, дойбы, асық ату (бес асық), арқан тартыс сынды спорттың 13 түрінен бақ сынаған.

- Спартакиаданың негізгі мақсаты - бұқаралық спортты кеңінен насихаттау, салауатты өмір салтын қалыптастыру, ұлттық құндылықтарды спорт арқылы дәріптеу және үздік командаларды анықтау, - деп түсіндірді Саран қаласының мәдениет, тілдерді дамыту, дене шынықтыру және спорт бөлімінің бас маманы  Мұхаммедрахым Әрнешов.

Спартакиадаға Саран қаласы атынан 114 спортшы қатысты. Нәтижесінде «Саран» командасы «Бес асық» жарысында 1-орынға, жазғы Президенттік көпсайыста 2-орынға, қол күрестен  3-орынға ие болды.

Жалпыкомандалық есеп бойынша Қарағанды қаласы 1-орынмен, Теміртау қаласы 2-орынмен, Шахтинск қаласы 3-орынмен марапатталды. Саран қаласы 4-орыннан көрінді.  

Жабылу салтанатында Саран қаласының мәдениет, тілдерді дамыту, дене шынықтыру және спорт бөлімінің бас маманы               Мұхаммедрахым Әрнешов Спартакиада туын Балқаш қаласының мәдениет, тілдерді дамыту, дене шынықтыру және спорт бөлімінің сектор меңгерушісі Нұрбек Дәлелбекке салтанатты түрде табыстады.

- Бұл жаққа Балқаш қаласынан бірнеше спорт түрінен командаларды әкелген болатынбыз... Спартакиада жоғары деңгейде өтті десек те болады. Ауа райының қолайсыздығына да қарамастан, спортшылардың жеңіске деген ұмтылысы, жігері көрінді. Бүгінгі тартысты сайыстардың куәсі болдық. Жалпы спартакиаданың нәтижесіне өте ризамыз, - деді Балқаш қаласының мәдениет, тілдерді дамыту, дене шынықтыру және спорт бөлімінің сектор меңгерушісі Нұрбек Дәлелбек.

Келесі «Арай – 2026» облыстық жазғы спартакиадасы Балқаш қаласында өтеді.

Дина ӘБДІҒАЛИЕВА