Қазақстан Республикасы — зайырлы мемлекет ретінде діни еркіндік пен конфессияаралық келісімді қамтамасыз етуді басты құндылықтарының бірі ретінде белгілеген. Бұл бағытта еліміз тек ішкі саясатта ғана емес, халықаралық деңгейде де өз үлесін қосып келеді.

Зайырлылық – мемлекеттің діннен бөлінуі, яғни діннің мемлекеттік басқару ісіне араласпауы, ал мемлекеттің діни ұйымдардың қызметіне ықпал етпеуі деген ұғымды білдіреді. Бұл қағида Қазақстан Республикасының Конституциясында нақты бекітілген.

Қазақстан – көптеген ұлт пен түрлі дін өкілдері тұратын үлкен отбасы. Бәріміз бір елде, бір ту астында бейбіт өмір сүріп жатырмыз. Осындай тыныштық пен бірліктің негізінде зайырлылық пен діндер арасындағы келісім де жатыр. Бейбітшілік пен татулықты сақтау – еліміздің басты жетістіктерінің бірі.

2003 жылдан бері елімізде Әлемдік және дәстүрлі діндер лидерлерінің Съезі тұрақты түрде өткізіліп келеді. Бұл форум Қазақстанның бастамасымен құрылған және бүгінде жаһандық деңгейде мойындалған диалог алаңы саналады. Бұл Съезд дінаралық, конфессияаралық түсіністік пен өзара құрмет мәдениетін дамытуға зор үлес қосуда.

Қазақстанның зайырлы мемлекет ретіндегі үлгісі мен конфессияаралық диалогты дамыту тәжірибесі – ел ішіндегі тұрақтылықтың, ұлттық бірліктің кепілі. Мемлекет пен діннің бөлінуі – діни сенім бостандығын, ал түрлі конфессиялар арасындағы ашық диалог – қоғамдағы келісім мен татулықты қамтамасыз ететіні сөзсіз.

Г. Ханафина,

қалалық ақпараттық-түсіндіру

тобының мүшесі