Саран қаласында сыбайлас жемқорлыққа қарсы «Заң және тәртіп» тұжырымдамасы аясында «Бүкіл әлем сыбайлас жемқорлыққа қарсы» тақырыбында дөңгелек үстел өтті.

Саран қаласының ішкі саясат бөлімінің мемлекеттік әлеуметтік тапсырысы аясында «Қарағанды облысының жастар және балалар ұйымдарының одағы» ЖҚБ Саран қаласының бюджеттік мекемелердің қызметкерлеріне және жастар ұйымдарының өкілдеріне арналған дөңгелек үстел ұйымдастырды. Бұл іс-шара әділдік, тәртіп және заңға құрмет қағидаттарын нығайтуға бағытталған.

Іс-шараның спикері - Е.А.Бөкетов атындағы  Қарағанды ұлттық зерттеу университетінің аға оқытушысы, з.ғ.м  Руслан Алтайұлы Тоқатов Қазақстан Республикасының сыбайлас жемқорлыққа қарсы заңнамасы және оны қолдану тәжірибесі жайлы айта отырып, мемлекеттік қызметшілердің этикалық нормалары мен адалдық қағидаттарын атап өтті. Тақырыпқа қатысты бірқатар мәселелер қарастырылды. Қатысушылар да өз ойын жеткізіп, белсенділік танытты.

Одан бөлек, қала жастарынан құралған ерікті топтың қатысуымен акция ұйымдастырылды. Акция аясында қала тұрғындарына сыбайлас жемқорлықтың алдын алу бойынша буклеттер таратылды.

Дина ӘБДІҒАЛИЕВА