Осыдан 30 жыл бұрын, яғни 1995 жылы 30 тамызда Қазақстан Республикасының Конституциясы қабылданды. Қаламызда айшықты мерекеге орай түрлі іс-шаралар мен танымдық бағдарламалар өтуде.

Ақтас кентінің мәдени-сауық орталығының конференц залында Ата Заңның 30 жылдығына арналған «Елдің негізгі заңы» атты  зияткерлік ойын-бағдарламасы өтті.

- Бағдарламаға №2 отбасылық оқу кітапханасы белсене атсалысты. Қатысушылар екі топқа бөлініп, ҚР Конституциясына қатысты сұрақтарға жауап берді. Шара ерекше форматта өтті.  Қатысушылар сұрақтарға еш қиындықсыз, дұрыс жауап берді. Одан бөлек, Ата Заң жайлы екі тілде ақпарат берілді, - деп Ақтас кентінің мәдени-сауық орталығының балалар, жасөспірімдер және жастармен жұмысы бойынша әдіскері Нүрзия Фаттахова атап өтті.

Зияткерлік ойын соңында қатысушылар Ақтас кентінің мәдени-сауық орталығының директоры Майра Кульджабаеваның атынан дипломдармен және естелік сыйлықтармен марапатталды.

Сонымен қатар, мереке қарсаңында Ақтас кентінде «Сіз үшін ҚР Конституциясы нені білдіреді?» бейнесұрақ алынып, «Ата Заңым – айбыным», «Мен Қазақстанның азаматымын» челлендері ұйымдастырылды. «Ата Заң – әділет пен парасат жолы» тақырыбында  дөңгелек үстел өтті. Ал 30 тамыз күні «Республикам – тірегім» атты  мерекелік концерт қою жоспарлануда.

Дина ӘБДІҒАЛИЕВА