Саранда жаңа оқу жылы қарсаңында дәстүрлі тамыз конференциясы өтті.
Ұстаздар қауымының басын қосқан алқалы отырыста облыстық білім басқармасының мектепке дейінгі және жалпы орта білім беру бөлімінің басшысы Гүлдана Нұрсұлтан, қала әкімінің орынбасары Сағынбек Бейскеев, білім бөлімінің басшысы Арман Бақтыбаев сөз сөйледі. Қалалық білім бөлімінің басшысы Арман Болатұлы өткен оқу жылының қорытындысын саралап, алда тұрған міндеттер мен стратегиялық бағыттарды айқындап берді.
- 2024 – 2025 оқу жылында қала оқушылары халықаралық, республикалық олимпиадаларда, байқауларда 125 жүлделі орынға, облыстық олимпиадаларда 236 жүлделі орынға ие болды. Өткен жылғы көрсеткішпен салыстырғанда, бұл 43 жүлделі орынға артық. Шамамен, әрбір үшінші қатысушымыз марапатпен оралады,- деді қалалық білім бөлімінің басшысы Арман Бақтыбаев.
Шарада мектеп пен балабақша арасындағы сабақтастық, заманға сай жабдықталған лабораториялардың жағдайы баяндалды. Биыл жас техниктер станциясында «Геймдизайн», «Инженерлік жобалау», «Техникалық дизайн», «Сәулеттік архитектура студиясы», «Термографика» үйірмелері ашылмақ. «Робототехника» және «Техникалық модельдеу» үйірмелерінің мүмкіндіктерін арттыру да жоспарлануда. «Достық үйі» балалар-жасөспірімдер шығармашылық орталығындағы үйірмелерінде де балалардың шығармашылық қабілетін дамыта түсетін оң өзгерістер күтілмек.
- Баршаңызды 2025-2026 жаңа оқу жылының басталуымен шын жүректен құттықтаймын! Бүгінгі кездесуіміз, бүгінгі тамыз конференциямыз жетістіктерімізді саралап, жаңа мүмкіндіктерімізді, міндеттерімізді айқындайтын маңызды алаң. Саран қаласы әрқашан білім беру саласындағы бай дәстүрімен, ұстаздардың кәсіби шеберлігімен және оқушылардың жоғары нәтижелерімен ерекшеленіп келеді. Біздің мектептерімізде балалардың бойындағы талантын ашып, оларды жауапкершілікке, білімге және Отанға деген сүйіспеншілікке баулитын нағыз шебер мамандар еңбек етуде,- деп атап өтті облыстық білім басқармасының мектепке дейінгі және жалпы орта білім беру бөлімінің басшысы Гүлдана Нұрсұлтан.
Білім беру ұйымдары қызметкерлерінің жұмыстары арнайы жасалған көрмеде тамашаланды. Онда робототехникадағы жетістіктер, оқу-білімге қызығушылықты оята түсетін оқулықтар мен авторлық жұмыстар таныстырылды.
- Қазіргі таңда жасанды интеллект қарқынды дамып келе жатыр. Балалардың кітап оқуға деген қызығушылығын ояту мақсатында біз ұжыммен бірлесе отырып, 10-15 беттен тұратын түрлі жанрдағы комикстерді ойлап таптық, - деді №7 мектеп-интернатының мұғалімі Әсел Молдабаева.
Сондай-ақ, білім беру саласын дамытуға мол үлес қосқан, педагогикалық қызметте шығармашылық табыстарға қол жеткізген қалалық білім беру ұйымдарының қызметкерлеріне Қарағанды облысының Білім басқармасының, Қарағанды облысында білім беруді дамытудың оқу-әдістемелік орталығының, қала әкімінің және білім бөлімінің грамоталары мен алғыс хаттары табыс етілді.
Қалалық білім беру ұйымдарының 2024-2025 оқу жылындағы рейтингінің қорытындысы бойынша №17 мектеп-гимназиясы «Үздік инновациялық мектеп» номинациясымен, Абай атындағы жалпы білім беретін мектеп «Үздік жалпы білім беретін мектеп» номинациясымен, «Колокольчик» бөбекжайы «Үздік мектепке дейінгі білім беру ұйымы» номинациясымен, қалалық балалар өнер мектебі «Үздік қосымша білім беру ұйымы» номинациясымен марапатталып, арнайы кубоктарға ие болды.
Салтанатты шара қалалық мәдениет үйінде басталып, кейін №1 мектеп-лицейінде мамандандырылған секциялар форматында жалғасын тапты.
Секцияларды Қарағанды облысында білім беруді дамытудың оқу-әдістемелік орталығының әдіскерлері, өңірдің тәжірибелі ұстаздары жүргізді.
Дина ӘБДІҒАЛИЕВА
