Ақтас кентінің мәдени-сауық орталығының алаңында еңбек пен бірлікті, береке мен дәстүрді ұлықтап жүрген татар халқының сүйікті мерекелердің бірі – Сабантуй мерекесі атап өтілді.
Дәстүрлерді жалғап, ұлт арасындағы достықты дәріптеп келе жатқан бұл мереке осымен 16 жыл қатарынан тойлануда. Биыл да тұрғындарға шаттық сыйланды. Баянның сүйемелдеуімен «Якташлар» этномәдени қоғамдық бірлестігі татар халқының ұлттық әндерін шырқап берсе, «Томирис» би ансамбілінің мың бұралған бишілері мерекелік көңіл-күй сыйлады.
- Барлықтарыңызды мерекемен шын көңілден құттықтаймын! Сабантуй – тек ұлттық мейрам ғана емес, халықтың рухын, ынтымағын, достығын ұлықтайтын ұлы мереке,- деді Ақтас кентінің мәдени-сауық орталығының директоры Майра Кульджабаева.
Арнайы Ақтас кентіне Шахтинск қаласынан «Алсу» ән-би ансамблі мен Абай қаласының «Ляйсян» өнер ұжымы келіп, көрермендерді музыкалық ән шашуымен баурап алды. Ойын-сауық бағдарламасы ұйымдастырылып, мол әсер сыйланды. Балалар қаппен секіру секілді қызықты жарыстарға қатысса, ал ата-аналар ағаш кесу, көзді байлап құмыраны сындыру сынды ойындарға белсене қатысқан. Жеңімпаздарға естелік сыйлықтар табыс етілді.
- Бізде бұл мереке жыл сайын өте жақсы өтеді. Кент тұрғындары асыға күтетін мерекелердің бірі. Биыл тамыз айында өткізу бұйырды. Сондай-ақ, «Якташлар» татар-башқұрт этномәдени бірлестігінің құрылғанына 17 жыл болды. Бірлестіктің жетекшісі Дания Фатихованың арқасында татар-башқұрт әндері шырқалып, дәстүрі дәріптелініп келеді, - деді «Якташлар» татар-башқұрт этномәдени қоғамдық бірлестігінің мүшесі Бахыт Тажинина.
Ашық аспан астында татар әндері орындалды, билері биленді. Көрермендер де дән риза болып, жақсы көңіл-күйде тарқасты.
Дина ӘБДІҒАЛИЕВА
