Қазіргі әлемде діни, этникалық және мәдени әртүрлілік – адамзат дамуының ажырамас бөлігіне айналды. Бұл әртүрлілік бір жағынан қоғамның рухани байлығын көрсетсе, екінші жағынан – белгілі бір жағдайда түсініспеушілік пен қақтығыстарға себеп болуы мүмкін. Осындай сын-қатерлерге қарсы тұру үшін бүгінгі күннің ең өзекті тетіктерінің бірі – конфессияаралық диалог пен ынтымақтастық.

Конфессияаралық диалог – әртүрлі діни сенім өкілдерінің өзара құрмет, түсіністік және бейбітшілік негізінде жүргізетін пікір алмасуы. Бұл диалог тек діни мәселелерді ғана емес, сонымен қатар адамгершілік, білім беру, отбасы құндылықтары, қоршаған ортаны қорғау секілді ортақ мүдделерге қатысты тақырыптарды қамтиды.

Мұндай диалогтың негізгі мақсаты – өзара дұшпандықты жою, төзімділік мәдениетін қалыптастыру және қоғамда сенім мен бейбітшілікті нығайту.

Діни конфессиялар арасындағы ынтымақтастықтың қоғам үшін маңызы зор. Біріншіден, ол экстремизм мен радикал идеологиялардың алдын алуға көмектеседі. Екіншіден, түрлі сенім өкілдерінің бірлескен гуманитарлық, әлеуметтік жобалары – халықты біріктіруге, қиындықтарды бірге еңсеруге жол ашады.

Мысалы, табиғи апаттар кезінде немесе әлеуметтік әлсіз топтарға көмек көрсетуде түрлі діни ұйымдар бірлесе әрекет етсе, бұл қоғамдағы өзара сенімді күшейтеді. Сондай-ақ, бірлескен мәдени іс-шаралар, жастар форумдары, қайырымдылық акциялары – конфессияаралық түсіністікті дамытуға ықпал етеді.

Қазақстан көпэтносты және көпконфессиялы мемлекет ретінде конфессияаралық келісім мен бейбіт қатар өмір сүрудің бірегей үлгісін көрсетіп отыр. Елде 18 конфессияға жататын 3 800-ден астам діни бірлестік тіркелген. Мемлекет діни сенім бостандығын қамтамасыз ете отырып, діндер арасындағы тепе-теңдік пен үйлесімді қатынасты сақтап келеді.

2003 жылдан бері еліміздің бастамасымен әр үш жыл сайын өткізілетін Әлемдік және дәстүрлі діндер көшбасшыларының съезі – конфессияаралық диалогтың халықаралық аренасындағы озық мысалы. Бұл съезд арқылы Қазақстан діндер арасындағы ынтымақтастықты жаһандық деңгейде дамытуға ықпал етіп келеді.

Конфессияаралық диалог – бір реттік іс-шара емес, үздіксіз, жүйелі түрде жүргізілуі тиіс процесс. Бұл бағытта әсіресе жастармен жұмыс маңызды. Себебі болашақ ұрпақ төзімділік, өзара құрмет пен түсіністік негізінде тәрбиеленсе ғана, тұрақты әрі қауіпсіз қоғам қалыптасады.

Сонымен қатар, бұқаралық ақпарат құралдары, білім беру жүйесі, үкіметтік емес ұйымдар мен діни көшбасшылар да осы үдеріске белсене атсалысуы қажет.

Конфессияаралық диалог пен ынтымақтастық – бейбітшілік пен тұрақтылықтың кепілі. Діни сенімдердің айырмашылығы қоғамның әлсіз тұсы емес, керісінше – оның мәдени, рухани байлығы. Сол байлықты сақтау, өзара түсіністік пен бірлікті нығайту – баршамыздың ортақ міндетіміз. Бұл жолда әрбір азаматтың саналы қатысуы мен мейірімді көзқарасы шешуші рөл атқарады.

 А. Аскеева,

қалалық ақпараттық түсіндіру

тобының жетекшісі