БИЫЛ САРАН ҚАЛАСЫНА ҚАРАСТЫ РТБ ЗАУЫТЫНЫҢ АУМАҒЫНДА БАЛАЛАРДЫҢ БОС УАҚЫТЫН ТИІМДІ ӨТКІЗУГЕ БАҒЫТТАЛҒАН, ШЫҒАРМАШЫЛЫҚПЕН АЙНАЛЫСУҒА МОЛ МҮМКІНДІК БЕРЕТІН, ТҮРЛІ СПОРТТЫҚ СЕКЦИЯЛАРМЕН ТАНЫСТЫРАТЫН АУЛА КЛУБЫ АШЫЛМАҚ.
Бұл жайлы Саран қаласы спорт орталығының әдіскері Екатерина Хисметова қалалық әкімдіктің инстаграм әлеуметтік желісіндегі ресми парақшасында «Adal komek» жобасы аясында өткізген тікелей эфирде атап өтті.
Қазіргі таңда спорт орталығының базасында «Веселые ребята», «Радуга», «Арман», «Настоящие друзья» атты төрт аула клубы жұмыс істеуде. Олардың барлығында да ортақ мақсат - балалар мен жасөспірімдер үшін бос уақытты ұйымдастыру, салауатты өмір салтын қалыптастыру, жауапкершілікке және белсенді азаматтық ұстанымға тәрбиелеу. Төртеуінің де өзіне тән ерекшеліктері бар.
- «Радуга» балалар-жасөспірімдер клубында балалар спортына көп көңіл бөлінеді. Мұнда сіздің балаңыз тоғызқұмалақ, дойбы, шахмат сияқты ойындармен танысады. Сондай-ақ клуб әдіскері спорттық жарыстар өткізеді. 2021 жылдан бастап «Аулофит» республикалық жобасы өткізілуде. Аулофит – бұл аулада спортпен шұғылдану. Саран қаласының жұмыспен қамту орталығымен бірлесіп «Жазғы драйв» жобасы өткізілді. Жобаға 30-дан астам студент қатысты. Студенттер аула клубтарының әдіскерлеріне іс-шараларды ұйымдастыру мен өткізуде көмек көрсетті, - деп атап өтті қалалық спорт орталығының әдіскері Екатерина Хисметова.
Ал «Настоящие друзья» аула клубы нағыз тапқыр, өнерді сүйетіндерге арналған. Онда балаларға көркемөнерпаздар мен бейнелеу өнері оқытылады. Клуб әдіскері балалардың адамгершілік тәрбиесіне көңіл бөледі. Түрлі тақырып аясында пікіралмасу, суреттер көрмесі мен челлендждер ұйымдастырады. Спорттық іс-шаралардан «Мой лучший друг» пен «Я, ты, он, она» көңілді сайыстар өткізілді. Қайырымды істерден де қалыс қалмай, «Добрые дела» атты акциясына да қатысқан.
Келесі болып талқыланған «Веселые ребята» аула клубы. Онда суреттер конкурсы, ойын бағдарламалары, балаларға арналған «Путешествие в мир – книги» атты кітаптар шолуы, түрлі көңілді эстафеталар өткізіледі. Үнемі ойындар, жаппай жаттығулар, конкурстар мен викториналарды ұйымдастырып тұрады. Сондай-ақ, «Дружба Народов» сайысы мен «Мы самая счастливая семья» бейнероликтер байқауы өткізілді.
«Арман» аула клубында аптасына үш рет жеңіл атлетикаға уақыт бөлінген. Одан бөлек қалалық кітапханамен де тығыз жұмыс жасайды. Балалар «Скажи ковиду - НЕТ!» акциясына қатысқан. Сонымен қатар, Қазақстан халқы Ассамблеясының еріктілер қозғалысының жетекшісімен кездесу ұйымдастырылды.
«Аула клубына кез-келген бала кіре алады. Клубтар барлық балалар үшін ақысыз жұмыс істейді. Карантинге дейін 363 адам қатысты. Олар карантин кезінде де бізбен байланыста болуды жалғастырды. Қазір біз оффлайн режиміне көштік», - деп толықтырып кетті Екатерина Хисметова.
2021 жылы аула клубтарын жөндеуге бюджеттен қаражат бөлініп, барлық клубтарда күрделі жөндеу жұмыстары жүргізілген. Жаңа парталар, орындықтар, стеллаждар, спорттық жабдықтар сатып алынды. Наурыз айында аула клубтар арасында марафон да өткізілді. Биыл балаларды түрлі спорттық секциялармен, шығармашылықпен айналысуға және бос уақытын тиімді өткізу мақсатында РТБ зауытының аумағында да аула клубын ашу жоспарлануда.
Аула клубтар балалардың келешекте жан-жақты, білімді, мәдениетті, өнерлі боп қалыптасуына өзінің оңды ықпалын тигізетіні айдан анық. Онда балалар тек бос уақыттарын тиімді өткізіп қана қоймай рухани да демалып, қоғамдық шараларға да өз үлестерін қосады.
Дина ӘБДІҒАЛИЕВА
