Қазіргі таңда JAIDARMAN ойындары – жастарға тек қана көтеріңкі көңіл-күй сыйлап қана қоймай, қоғамдағы ойларды, маңызды мәселелерді қозғап, достық қарым-қатынастың нығайуына септігін тигізуде. Иә, бүгінгі таңдағы JAIDARMAN ойындары жастар арасында қарқынды дамуда. Себебі, JAIDARMAN – жастарды тәрбиелеп қана қоймай, қоғамдағы келеңсіз мәселелерді астарлы әзілмен жеткізуде.
Ақтас кентіндегі № 16 жалпы білім беретін мектептің оқушыларынан құралған «Ақтас ұшқындары» командасы «Маусымашар – 2023» фестивалінде жақсы деңгейде өнер көрсетіп, «Bala Jaidarman» лигасынының телевизиялық жобасына қатысу үшін сертификат ұтып алды.
«Ақтас ұшқындары» құрамы – Гүлзат Шағарғазы, Сұлтансері Жақсылықов, Ерсұлтан Орынбасар, Толғанай Сейілхан, Жаңыл Асылғазиева есімді өнерлі өрендерден құралған. Команда 2022 жылдың қазан айында құрылған екен. «Сыбайлас жемқорлықтың алдын алу» тақырыбында өткен қалалық байқауда «Достық үйі» балалар-жасөспірімдер шығармашылығы орталығына қарасты қазақша КВН үйірмесінің меңгерушісі Алданыш Мұсабековтың жетекшілігімен екінші орынды иеленіп, облыстық кезеңге жолдама алған болатын. Бұл жолы да ақтастық әзілкештер жүрісінен жаңылмады. Облыстық кезеңде өткен фестивальде «Ақтас ұшқындары» командасы сертификат иеленіп, республикалық жайдарман ойындарына жолдама алды. Өнерлі, әртістік қабілеті зор, әзіл айта білетін жастарымызды анықтау, әзіл арқылы қоғамдағы келеңсіз жайттарды жеткізу, оқушылардың тілдік қорын дамыту, аңғарымпаздық қасиеттерін байқау мақсатында өткен «Маусымашар – 2023» фестивалінде республика бойынша 200 команда өз ара бақ сынасқан екен. Ал сол 200 команданың ішінде «Bala Jaidarman» лигасында республика бойынша 10 команда қатысса керек-ті.
Осылайша, үстіміздегі жылдың 29 қаңтары мен 5 ақпаны аралығында Астанада өткен «Жайдарман» ойындарының 2023 жылғы маусымының ашылуында өнер көрсеткен «Ақтас ұшқындары» тобы «Маусымашар – 2023» «Bala Jaidarman» лигасынының телевизиялық жобасына қатысу үшін сетификат ұтып алды.
Өз кезегінде команда жетекшісі Алданыш Мұсабеков, осы ойындарға қатысу үшін «Ақтас ұшқындары» командасына қаржылай демеушілік жасап, қолдаған кәсіпкерлер Валерий Алексеевич Лобаевке, Виталий Андреевич Климовқа, «СКЭП» жауапкершілігі шектеулі серіктестігінің басшысы Шәріп Машрабұлы Исеновке, сонымен қатар, «Достық үйі» балалар-жасөспірімдер шығармашылығы орталығы басшысының міндетін атқарушы Арман Қайратқызы Жұмабековаға, № 16 эалпы білім беретін мектептің директоры Шынар Садвакасовна Ускенбаеваға, директордың орынбасары Индира Болатқызы Бейсенбаеваға, сынып жетекшісі Гүлім Сейілханқызы Жанболатоваға алғысын жеткізді.
Ақтастық әзілкештерге шығармашылық табыстар мен биік белестерді бағындырып, кент мәртебесін биіктете берулеріне тілектестігімізді білдіреміз. «Ақтас ұшқындары» командасы тек Ақтас кентінің ғана емес, Саран қаласының да мақтанышы. Алдағы ойындарына сәттілік тілеп, жеңіспен оралуларына тілектеспіз!
Шапағат ҚОСШЫҒҰЛОВ
