6 желтоқсан күні Ақтас кентінің мәдени-сауық орталығында Тәуелсіздік күніне орай ҚР Еңбек сіңірген жаттықтырушысы, «Ақ шаңырақ» қазақ халқының әдет-ғұрып, салт-дәстүрін қайта жандандыру этномәдени қоғамдық бірлестігінің мүшесі Мұсабеков Амангелді Әбдішұлына арналған «Ұстаз.Өнерпаз.Тұлға» атты шығармашылық кеш өтті.
Мұсабеков Амангелді Әбдішұлы 1948 жылы Қарағанды облысы, Қарқаралы қаласында көпбалалы отбасында дүниеге келген. Әкесі Әбдіш Мұсабеков білім саласына бар ғұмырын арнап, ұстаздық қызмет жасаса, анасы Мәкен Манамбаева жанұясында бала тәрбиесімен айналысқан. Амангелді Әбдішұлы жастайынан әжесінің қолында тәрбиеленген көрінеді. «Көп жасағаннан сұрама, көпті көргеннен сұра» демекші, бұл шығармашылық кеште абзал жанның өмірбаянынан бастап, жеткен жетістіктері, өмірі мен толымды шығармашылық жолы әңгіме арқауы болды.
Ақтас кентінің әкімі Бауыржан Аканов шараға қатысып, кезінде еркін күрестен Әлем чемпиондарын тәрбиелеген, мықты бапкерге, бүгінде өнер саласына өз үлесін қосып жүрген Амангелді Мұсабековке алғыс хатын табыстай отырып, үстіне шапан жапты. Ақтас кентінің мәдени-сауық орталығының директоры Майра Кульджабаева да сыйластығын білдіре отырып, өз атынан алғыс хат табыстап, сый-сияпатын көрсеткен. Бұхар жырау ауданының тұрғыны, Тоғызқұдық ауылының тумасы, Амангелді Мұсабековтің шәкірті Боранбай Тергеубеков пен Бұхар жырау ауданының мәдениет үйінің меңгерушісі Бақыт Биболова да арнайы шығармашылық кешке келіп, кеш иесіне арнаған тартуларын табыстаған.
- Мұсабеков Амангелді Әбдішұлы – бұрында өзі жаттықтырушы болған. ҚР Еңбек сіңірген жаттықтырушысы, Орал қаласында 15 жыл тұрыпты. Одан кейін біздің Ақтасқа көшіп келіп, «Ақ шаңырақ» этномәдени бірлестігіне келіп, өнер саласына атсалысып жүргеніне 6 жыл болды. Сол кісінің еңбегін жас ұрпаққа, өскелең ұрпаққа тәрбие болсын деген мақсатта осындай шығармашылық кешті ұйымдастырдық, - деді «Ақ шаңырақ» қазақ халқының әдет-ғұрып, салт-дәстүрін қайта жандандыру этномәдени қоғамдық бірлестігінің жетекшісі Марта Супьянова.
«Әу» демейтін қазақ жоқ демекші, бұл кеште Амангелді Мұсабековтің өзі де әннен шашу шашып, авторлық әндерін де орындаған. «Ақ әже, аталар» вокал тобы, «Томирис» би ансамблі, мәдени-сауық орталығының шығармашылық ұжымдары да қолдауын көрсетіп, музыкалық сәлемдемелерін арнады.
Дина ӘБДІҒАЛИЕВА
