Саран қаласында осымен екінші мәрте балалар музыка және өнер мектептерінің, колледждердің музыкалық бөлімдері педагогтерінің орындаушылық шеберліктерінің «Шабыт шаттығы» атты IХ облыстық байқауының «Хореографиялық өнер» номинациясы өтті.
6 желтоқсан күні қалалық мәдениет үйіне Қарағанды облысы бойынша жан-жақтан өнер мектептерінің, колледждердің педагогтері келіп, сахнаны жандандыра түсті. Оған бірде-бір себеп – дәстүрлі «Шабыт шаттығы» облыстық байқауы еді. Оны Қарағанды облысы білім беруді дамытудың оқу-әдістемелік орталығы, қалалық білім беру бөлімі мен балалар өнер мектебі басынан-аяғына дейін ұйымдастырып, облыстық байқаудың «Хореографиялық өнер» номинациясы жақсы деңгейде өтуіне атсалысты. Қарағанды облысының қосымша білім беру педагогтері қауымдастығының жұмыс жоспарына сәйкес, білім беру ұйымдарында «Біртұтас тәрбие» бағдарламасы мен «Шабыт» жобасын жүзеге асыру аясында өткізілген байқаудың шымылдырығын қалалық балалар өнер мектебінің «Қыран» хореографиялық ансамблі қазақ биімен ашты. Сол күні киелі сахнада өз бағын сынап келген қатысушыларға деген ізгі тілектер де айтылды.
- Биылғы оқу жылында «Шабыт шаттығы» байқауын ашып отырмыз. Оны ашып отырған сіздерсіздер, әдемі де көрікті, сұлу қыздарымыз. Бүгінгі байқаудың бастамасы қандай болады, осыдан кейін өтетін әріқарай үш кезеңі осындай әдемі, мазмұнды өтеді деп есептеймін. Бүгін барлықтарыңыз өз өнерлеріңізді көрсетесіздер деп ойлаймын. Сәттілік тілеймін!, - деді Қарағанды облысында білім беруді дамытудың оқу-әдістемелік орталығының әдіскері, әрі байқаудың әділ қазы алқасының мүшесі Айгүл Қалмағамбетова.
Сондай-ақ, талантты да дарынды қатысушылардың өнерін Тәттімбет атындағы Қарағанды өнер колледжінің хореографиялық пәндер оқытушысы, «Шабыт шаттығы» VIII облыстық конкурстың жеңімпазы Елена Кузнецова мен ардагер ұстаз, ҚР Білім беру ісінің үздігі, ҚР Мәдениет министрінің Құрмет грамотасының иегері Людмила Прадан бағалап, қазы алқасының мүшесі ретінде әр бидің құрылымына, эстетикасына, жанрлық сәйкестігіне, шеберліктеріне ерекше назар аударды.
Қатысушылар арасынан ең бірінші болып иірімдерге толы, ырғақты әуенді өзбек биімен шыққан Ақбота Әбілқадыр бұл байқауға үлкен жауапкершілік танытып, жете дайындалған. Сахналық нөмірін қоюға ұстазымен бірге бір аптадай уақыт кетсе, ал оны жаттап, жетілдіруіне бір өзіне бір ай уақыт кеткен. Облыстық байқауға келуі де бірінші рет емес.
- Мен Шет ауданы С.Мұхамеджанов атандағы балалар өнер мектебінде педагог-хореограф ретінде 4 жыл болды жұмыс істеп келемін. Биыл байқауға екінші жыл келуім, былтыр 3-орынға ие болдым. Жалпы өз әсеріммен бөліссем, өте қатты қобалжыдым. Сахнаға бірінші болып бірінші рет шығуым. Өте әсерлі сәт болды, - деді Ақбота Әбілқадыр.
«Хореографиялық өнер» номинациясында жеке орындау бойынша қатысушылар жас ерекшеліктеріне қарай 3 санатқа бөлініп, өнер көрсеткен. Он бес нөмірдің ішінен тек жалғыз «Айша бибі» хореографиялық ансамблі ғана «Ансамбль» номинациясына қатысқан.
- Өте қуаныштымыз, хореограф мамандарға өздерін дамытуға, жетілдіруге, кәсіби орындаушылықты одан әрі дамытуға мүмкіншіліктер беріп тұр. Біліктілігімізді қанша жыл арттырып отырсақ та, біз үнемі ізденісте жүруіміз керек. Сондықтан да, ұйымдастырушыларға алғысымыз шексіз. Өзімді бақытты педагог, бақытты ұстаз деп айта аламын, өйткені шәкірттеріммен бірге сахнада өнер көрсету мен үшін үлкен жеңіс. Қаншама жылдан кейін шәкірттеріммен бірге сахнада билеймін деп ойлаған жоқпын. «Шабыт шаттығы» байқауы жалғасын таба берсін, - деп өз әсерімен бөлісті 33 жыл өнер саласында жүрген, білікті педагог-хореограф, Қарқаралы қаласының балалар өнер мектебінің директоры Рымкүл Спабекова.
Өнер, оның ішінде би өнері – тілсіз өнер. Ол арқылы адамзаттың сезімін, қайғы-қасіретін, ішкі жан дүниесін, бүгінгі, кешегі тарихты жеткізуге болады. Тәжірибелі бишілердің өнерін бағалау да қазылар алқасына оңай соқпайтыны хақ. Себебі әр нөмірдің артында таза еңбек, дайындық пен өзіне тән ерекшелік жатыр.
Мың бұралған бишілердің әсем де әсерлі нөмірлерімен ерекшелене түскен «Шабыт шаттығы» облыстық байқауының қорытындысы, бүгін, яғни 11 желтоқсан күні ZOOM платформасы арқылы өтетін облыстық вебинар барысында жарияланады. Әрі, ұйымдастырушылар, Қарағанды облысында білім беруді дамытудың оқу-әдістемелік орталығының «umckrg.gov.kz» сайтына орналастыруды жоспарлап отыр.
Дина ӘБДІҒАЛИЕВА
