12 желтоқсан күні қалалық мәдениет үйінде Саран қаласының әкімі Дарын Бұлқайыр қала ақсақалдарымен, ардагерлерімен, төрағаларымен және белсенділерімен кездесіп, еркін пікір алмасты.

Шара барысында қала басшысы қай заманда болмасын елдің ағасы болған, елі құрмет тұтқан аузы дуалы, көнекөз, қазыналы қариялардың еңбегі кейінгі буынға үлгі, ақыл-кеңесі құнды екендігін айта отырып, алдағы уақыттарда бірігіп жұмыс жасайтынын жеткізді.

- Шынында да, қалада көптеген мәселелер бар. Оны бәріміз де білеміз. Сол себепті, өзіме міндеттер қойдым, бұл коммуналдық саламен айналысу. Жылу, жарық, кәріз бойынша көптеген сұрақтар бар. Оның ішінде абаттандыру да кіреді, - деп атап өтті қала әкімі Дарын Бұлқайыр.

Сондай-ақ, қаланың әлеуметтік-экономикалық даму көрсеткішін жақсартуға бағытталған бірқатар ұсыныстар мен кеңестер тыңдалды. Қала әкімі алдағы уақыттарда жастардың бос уақытын тиімді әрі пайдалы өткізу мақсатында «Жастар үйін» салу жоспарда барын айтты. Оның ішінде тарихтан сыр шертетін музей мен білімді жетілдіре түсетін курстарды ашу қарастырылатын болады.

Кездесу барысында жылыту жүйесі, су, жарық, жол секілді көптің санасында жүрген өзекті мәселелерге ерекше назар аударылды. Қаланың абаттандыру мен сырт келбетіне қатысты бірқатар ұсыныстар түсті.

Қарағанды-Саран автожолын жарықтандыру мәселесі де ұмыт болмай, сол күні көтерілді. Сонымен қатар, қаланың ажарын аша түсетін шағын сәулет нысандары мен муралдарға қатысты ой-пікірлер ортаға салынды.

Қала әкімі Дарын Бұлқайыр барлық сұрақтарға жауап бере отырып, халықтың мұң-мұқтажын тыңдауға дайын екендігін жеткізді. Елдің арқа сүйер ардагерлері де өз тарапынан қала басшысына сәттілік тілеп, ақ батасын берді.

Дина ӘБДІҒАЛИЕВА