12 желтоқсан күні №1 мектеп-лицейінде Кеңес Одағының батыры, ұшқыш-шабуылдаушы Нұркен Әбдіровке арналған патриоттық-танымдық шара өтті.
Онда Отан үшін от кешкен, Ұлы Отан соғысында 23 жасында қаза тапқан Нұркен Әбдіровтің қайталанбас ерен ерлігі ұлықталды. Естеліктер айтылып, тарих беттеріне үңіле отырып, өмірбаянынан сыр шертілді. Майданда қаза тапқан жауынгерлер мен бейбіт өмірге оралып, бүгінде марқұм болған барша ардагерлер бір минут үнсіздікпен еске алынды.
- Ұлы Отан соғысына байланысты оқиғалар тарих қойнауынан одан әрі жылжуда. Бірақ Отан үшін ерлікпен шайқасқандардың есімі біздің жүрегімізде мәңгі сақталады, - деді қалалық ардагерлер кеңесінің төрағасы Жұмабике Токушева.
Жасөспірімдердің патриоттық, жоғары азаматтық сезімін қалыптастыруға бағытталған шарада оқушылар сол бір зұлмат жылдарға қатысты көрініс қойып, Нұркен Әбдіровтің монологынан үзінді оқып берді. «Аспанымыз ашық, еліміз тыныш болсын» дей келе, әдебиет әлеміне сүңгітті. Жас буынның қойылымы, артқы фонда ойнаған әннің сөздері аға буынның көзіне еріксіз жас келтірді.
Сондай-ақ, №1 мектеп-лицейінде Нұркен Әбдіровке арналған кітаптардан құралған шағын көрме ұйымдастырылды. Сыбайлас жемқорлыққа қарсы ақпараттық - ағарту пулының мүшесі, саясаттанушы Серік Мустафин батырдың жанқиярлықпен жүріп өткен жолын еске алып, сол көрмеде қойылған кітаптарға шолу жасады.
Келесі болып сөз алған кенші еңбегі ардагерлерінің бастауыш ұйымы активінің мүшесі Татьяна Супрунова барлық қатысушыларды Саран қаласының 70 жылдық мерейтойымен, Тәуелсіздік күнімен және алда келе жатқан жаңа жыл мерекесімен құттықтай отырып, Нұркен Әбдіровтің қайсар мінезін, өшпес ерлігін баян етті.
Қалалық ардагерлер кеңесі мен №1 мектеп-лицейі бірлесе ұйымдастырған патриоттық-танымдық шараның соңында Саран қаласының құрметті азаматы Жұмабике Токушева сөз сөйлеп: «Бүгін біз осы шара арқылы батырларымыздың ерлігін тағы бір мәрте еске алдық. Ата-бабаларымыздың арқасында біз ашық аспан астында өмір сүріп келеміз. Осы іс-шараның өтуіне атсалысқан барлық қатысушыларға алғысымды білдіремін. Оқушыларымыздың өмір жолы ақ болсын. Білімдеріңді шыңдай берулеріңе тілектеспін», - деп тілегін білдірді.
Дина ӘБДІҒАЛИЕВА
