Саран... Саран қандай қала? Саран – көпшіліктің ыстық ықыласына бөленген қонақжай қала. Жылы жүзді, дарынды да талантты, «сегіз қырлы –бір сырлы» тұрғындарымен ерекшелене білетін қала. Дәл бұл жерден қала тұрғындары алғашқы бастамаларын жасап, өз ісін дөңгелеткен, дәл бұл жерде тың ойлар, асқақ армандар мен мұратқа жетелеген мақсаттар пайда болды. Шағын қала болса да, кең жүректі тұрғындарымен бай. Мұнда көптеген ұлт өкілдері аянбай еңбек етіп, бір шаңырақтың астында достық пен бірлікте, татулықта өмір сүріп келеді. Дәл бүгін терең тарихымен құнды сүйікті қаламызға - 70 жыл.
Қаланың тарихы сонау 1954 жылдан бастау алады. Осы уақыт аралығында қаланың сырт келбеті мен мәдени мұрасы айтарлықтай өзгерді. Жаңа тұрғын үйлер бой көтеріп, көшелер мен заманауи алаңдар пайда болды. РТИ елді мекенінде елеулі өзгерістер орын алды. Осындай айтулы да айшықты меретой қарсаңында 20 желтоқсан – қаланың құрылған күнінде дүниеге келген қала тұрындарымен тілдесіп, ізгі тілектерін естіп қайттық.
КӨЗ АЛДЫМДА ӨСКЕН ҚАЛА
Саран қаласында «Дубовская» шахтасында 17 жыл жұмыс істеген Сагадеева Ирина Григорьевна 1951 жылы 20 желтоқсан күні Қостанай қаласында дүниеге келген. 1954 жылы ата-анасы Саран қаласына көшкенде, ол небәрі 3 жаста еді. Алайда Саранда өткізген балғын балалық шағын ерекше ынтық ықыласпен еске түсіреді. 1977 жылы әскери қызметкерге тұрмысқа шығып, Байқоңырда 5 жыл тұрып, кейін жолдасының қызметі аяқталған соң сүйікті Саран қаласына қайта оралған.
- Мен «Дубовская» шахтасында, кезінде «Сабурханская», №38 фабрикаларда жұмыс істегенмін. Қазір зейнеттемін. Екі қызым мен бір ұлым бар. Туған күнімді көбіне туған-туысқандарымның, жора-жолдастарымның ортасында атап өтемін. Соңғы үш жылда Саран айтарлықтай өзгергенін байқауға болады. Жолға асфальт төселіп, жарық мәселелері шешілуде. Жылу жүйесімен де барлығы оңынан болып, алдағы уақыттарда жақсы нәтижелерге қол жеткіземіз деген үміттемін. Саран қаласының гүлденіп жатқанын өз көзімен көріп келемін. Балаларым мен немерелерім тұратын, сүйікті қаламыз әріқарай да дами берсін. Осындай мерейтойда барлықтарыңызға жақсылық тілеймін!, - деп бізбен ізгі тілегімен бөлісті өз ортасында құрметке бөлене білген сыйлы жан, үш баланың ардақты анасы.
БІЗ ҮШІН ЕРЕКШЕ КҮН
Ал жарты ғасырдан көп, 52 жыл Саран қаласында өніп-өсіп, өз кәсібін ашқан, бүгінде көпшілігін өз туғанындай жақсы білетін Майзнер Светлана Викторовна үшін қала күні ең ерекше күндердің бірі. Себебі 20 желтоқсан күні дүниеге шыр етіп айдай сұлу қызы келді.
- 2005 жылы қызым дүниеге келді. Қызым №6 жалпы білім беретін мектепті аяқтаған соң, Ресейге, Калининград қаласындағы Иммануил Кант атындағы Балтық федералды университетіне оқуға түсті. Қазір сонда білім алуда. Қызымыздың туған күнін отбасымызбен, достарымызбен, туған-туыстарымызбен тойлаймыз. Сырғанақ тебуге, төбешіктен сырғанауға шығатынбыз. Әрдайым көңілді әрі белсенді уақыт өткізгенді жақсы көреміз, - деп атап өтті аяулы ана.
Светлана Викторовна – жеке кәсіпкер. Сауда саласына бет бұрғанына да біраз болды. Оның жеміс-жидектеріне сұраныс күннен-күнге артуда. Оның ұлы да Саран қаласында білім алып, Абай атындағы Саран жоғары гуманитарлық-техникалық колледжді қызыл дипломмен аяқтап, кейін Қазтұтынуодағы Қарағанды университетін тәмамдаған. Бүгінде қаламыздағы танымал «Гастроном» сауда орталығында жеміс-жидектер бөлімінің иесі. Айрандай ұйыған шаңырақтың барлық бастауы осы Саран қаласынан басталған.
- Саран қаласы – шағын болса да жайлы және мейірімді адамдарымен бағалы. Меніңше, бұл жерде әркім бір-бірін біледі. Бұл өте жақсы. Маған барлығы жарқын жүзді, кең пейілді болып көрінеді. Бір жағыннан біз мұнда үйреніп қалдық. 52 жыл болды Саран қаласында тұрып келеміз. Әрине, адамдардың көбі бізді таниды. Барлығы көз алдымызда өтіп жатыр десем де болады. Тіпті, көз алдымызда олардың балалары есейіп, ержетті. Сол себепті бұл жерде барлығы туған-туысқанымыздай болып кетті, - дейді жеке кәсіпкер.
«СҮЙІКТІ ҚАЛАМЫЗ ӨРКЕНДЕЙ БЕРСІН!»
Қоғамның тыныштығын күзетіп, күн-түн демей жұмыстан табылатын Саран қаласының полиция бөлімінде криминалдық полиция бөлімшесінің бастығының орынбасары Қазиев Айбар Асқанұлының туған күні де 20 желтоқсанға келіп тұр.
- Мен туған күнімде көбіне жұмыста боламын. Біздің жұмысымызда күнде не болатынын, күн мен түннің қалай өтетіні белгісіз. Сондықтан әрдайым түрлі жағдайларға дайын болуымыз керек. Ел-халықтың тыныштығын сақтауға аянбай күш саламыз, - дейді Айбар Асқанұлы.
Ол Жамбыл облысының тумасы болса да, Саран қаласына аз уақыт ішінде бауыр басқан. 2019 жылы Қазақстан Республикасы ІІМ Шырақбек Қабылбаев атындағы Қостанай академиясын аяқтағаннан кейін, полиция қызметіне бет бұрған. Қарағанды қаласы ПБ Теміржол полиция бөлімінде кринималдық полицияның жедел уәкілі болып жұмыс істегеннен кейін 2023 жылдың қаңтар айында Саран қаласының полиция бөлімінде криминалдық полиция бөлімшесі бастығының орынбасары лауазымына тағайындалған.
- Отбасымызбен Саран қаласына үйреніп қалыппыз. Саран – тыныш, таза қала. Шағын болса да өзімізге өте ыстық. Балаларым да осында өсіп келеді. Барлықтарыңызды Саран қаласының 70 жылдық мерейтойымен құттықтаймын! Сүйікті қаламыз өркендей берсін! Болашаққа деген сенім мен үміт бізді биік белестерге, заңғар асуларға жетелей берсін. Республика бойынша ең мықты қалалардың біріне айналуына тілектеспін. Әр шаңырақтан құт-береке, ырыс-ынтымақ кетпесін. Аспанымыз ашық , еліміз аман, жұртымыз тыныш болсын!,- деп тілегін білдірді Айбар Асқанұлы.
P.S.: Көпшілікке жарқын сәттерді сыйлай білген, әлі де қызыққа бөлейтін салтанаты жарасқан Саран қаласын және дәл осы күні дүние есігін ашқан барлық қала азаматтарын туған күнімен құттықтаймыз! Дендеріңізге саулық, бастарыңызға байлық, кіршіксіз өмір, кірбіңсіз таза көңіл тілейміз. Қаламыздың мерейі, қуанышы жылдан-жылға арта берсін. Берекесі мен мерекесі таусылмасын. Мерейтой құтты болсын!
Дина ӘБДІҒАЛИЕВА
