23 желтоқсан күні мемлекеттік әлеуметтік тапсырыс шеңберінде «Білім, білік пен дағды – қауіпсіздік және еңбекті қорғау негізі» жобасын іске асыру бойынша №6 жалпы білім беретін мектепте семинар-тренинг пен оқу-жаттығу жұмыстары өткізілді.
Бұл шара қалалық ішкі саясат бөлімінің тапсырысымен және «Мир добра» қоғамдық ұйымының, «ҚР қызыл жарты ай қоғамы» ҚБ Қарағанды облыстық филиалының, қалалық төтенше жағдайлар бөлімімен және білім бөлімімен бірлесе ұйымдастырылған. «Білім беру ұйымдарындағы қауіптердің жекелеген түрлеріне демонстрациялық модельдеу арқылы төтенше жағдайлар кезіндегі іс-қимыл алгоритмдері» тақырыбында өткен семинар-тренингті «ҚР қызыл жарты ай қоғамы» ҚБ Қарағанды облыстық филиалының директоры Татьяна Абрамова жүргізіп, эвакуация кезінде әрекет ету тәртібін жете түсіндірді. Оның айтуы бойынша, қазіргі уақытта тек балаларға ғана емес, сондай-ақ, олардың ата-аналарымен де тығыз жұмыс істеп, қауіпсіздік шарттарын айту керек. Себебі, апат айтып келмейді. Төтенше жағдайға тап болған кез келген адам сасқалақтап қалмауы үшін, ең алдымен, қарапайым төтенше жағдайлар кезіндегі өзін-өзі ұстау ережелерімен таныс болуы тиіс. Одан бөлек, дұрыс алғашқы көмек көрсету тәртібіне аса мән берілді. Бұл тұрғыда тәжірибе жүзінде ес-түссіз жатқан адамның тамыр соғысы, тыныс алуы тексерілді. Егер де керісінше тамыр соғысы сезілмей, тыныс алу белгілері болмаған кезде алғашқы көмек көрсету тәртібі көрсетілді. Әрі қаламыздағы білім ұйымдарының өкілдеріне «дабыл чемоданның» ішіне кіретін заттарға мағлұмат берілді. Мұндай чемоданның ішінде төл құжаттардан бастап, дәрі-дәрмек пен жылы киімге, тіпті қалам мен дәптерге дейін болу керектігі айтылды. Төтенше жағдайға арналған дабыл түймелері бойынша мәлімет бере отыра, ғимараттың ішінде күмән тудыратын белгісіз зат табылған жағдайда қандай іс-әрекеттер жасау керектігі жөнінде ақпараттық-түсіндіру жұмыстары жүргізілді.
Ал қалалық төтенше жағдайлар бөлімінің бастығы Сергей Анищенко болса, қазіргі жаңа жылдық қарбалас кезіндегі сақтық шаралардың дұрыс сақталуына тоқталып, бүгінде республика аумағында «Өрт қауіпсіздігі» айлығы өтіп жатқанын баян етті. Әрі білім ордаларында сақталуы тиіс сақтық шаралары жайлы ақпарат берді.
- Бүгінгі семинар орынды ұйымдастырылды. Өйткені бүгінгі күні баланың қауіпсіздігі, мектеп қызметкерлерінің, ұстаздардың қауіпсіздігі алдынғы орында тұр. Жауапты мамандар бүгінде теория түрінде, кейін тәжірибелік түрде көрсетіп жатыр. Әрине, бұдан алар дүние көп. Ұйымдастырушыларға көп рақмет. Өткені бұл өте маңызды шара. Бүгінгі күні қауіпсіздікті қай жағынан алсаңыз да, өрт қауіпсіздігі жағынан болсын, осының бәрі өте қажет, маңызды мәселе, - деді шараға қатысқан қалалық балалар өнер мектебінің директоры Толқын Мусалиева.
Тәжірибе демекші, семинар-тренигтің соңы төтенше жағдайлар бөлімінің оқу жаттығу жұмыстарымен жалғасын тапты. Ондағы жоспарға сәйкес, білім ордада өрт шығып, шұғыл балалар мен ұстаздарды эвакуациялау керек болған. Нәтижесінде 3 минут 43 секунд уақыт аралығында 30 ұстаз, 615 оқушы мен 12 техникалық персонал қауіпсіз жерге орнықты.
Сонымен қатар, қойылған нұсқаулықтар талабы бойынша түсіндіру жұмыстары жүргізілді.
Дина ӘБДІҒАЛИЕВА
