Дәл осы үш сиқырлы сөз арқылы 27 желтоқсан күні «Сұңқар» стадионында қаламыздың бас шыршасы айналаға шуағын шашып, шамдарын жарқыратты.
Орталыққа жиналған қауымның барлығы бұл күнді, нақтырақ айтсақ, ғажайыпқа толы бұл сәтті асыға күтті. «Ескі жыл есірке, жаңа жыл жарылқа» демекші, мерекелік шара қазақтың жыл санауы бойынша кірген Ұлу жылына деген алғысын айтуға, келер Жылан жылына зор үміт білдіруге мүмкіндік сыйлай білді. Еңбектеген баладан еңкейген қартқа дейін сәні келіскен салтанатты тамашалауға асықты. Бірі игі тілегін айтса, енді бірі ерекше костюм киім, көпшілікті сүйсіндірді.
Дәстүрлі шырша шырақтарын жағу рәсіміне қала тұрғындары мен қонақтарына қала әкімі Дарын Бұлқайыр ізгі лебізін жолдады.
- Сіздерді келе жатқан Жаңа жылмен құттықтаймын! Барлықтарыңызға денсаулық, қажымас қайрат тілеймін. Келер жыл сіздерге жаңа табыстар мен жетістіктер әкелсін. Қаламыз көркейе берсін, - деді қала басшысы.
Жаңа жыл алды думанды көптің сүйікті кейіпкерлеріне айналған Аяз Ата мен Ақшақарсыз елестету мүмкін емес. Алайда, осы жолы мерекелік бағдарламада бір емес бірнеше бас кейіпкерлеріміздің шеруін көрдік. Олардың өнері көпті таң-тамаша етті. Тылсым сиқырға, көздің жауын алатын ғажайып сұлулықтың дәл ортасынан шаттық күйі сыйланды.
- Келе жатқан жаңа жыл құтты болсын! Саран қаласының тұрғындарына ең алдымен бірлік, бірліктен кейін барлықтарыңызға зор денсаулық тілеймін! Әр жаңа жылды күлімсіреп қарсы ала берейік. Қаламыздың тұрғындары көбейе берсін!, - деп ізгі тілегін білдірді 3 жыл қатарынан Аяз ата болып ойнап жүрген №2 жалпы білім беретін мектепте дене шынықтыру пәнінің мұғалімі Али Ускенбаев.
- Мен биыл бірінші рет Ақшақар кейпінде болдым. Басында өте қатты қобалжыдым. Себебі, әр баланың тілін таба білу оңай емес қой!? Алайда, балалармен жұмыс істеген өзіме қатты ұнады. Қолымнан келетіне көзім жетті. Ақшақардың киімін кигенде де бойымды шаттыққа толы сезім баурап алды. Ал шараның өзі жоғары деңгейде өткеніне қуаныштымын. Келе жатқан жаңа жыл жарқын сәттерге, бақытқа, қуанышқа толы болсын!,- деп тілегін білдірді қалалық мәдениет үйінің әдіскері Зарина Ашикова.
«Амадеус» хореографиялық ансамблі мен «Realize» көше және заманауи би клубының бишілері ырғақты билерімен халықты мерекелік көңіл-күйге бірден бөледі. «Амадеус» хореографиялық ансамблінің жетекшісі Наталья Кан да барлық тұрғындарды сиқырлы сәтпен құттықтады.
- Жаңа жыл сәтті және жақсы оқиғалар мен таныстарға, тілектер мен мүмкіндіктерге бай болсын. Қуанышты сәттерді жақын адамдарымызбен бірге қарсы алайық. Барлықтарыңызға денсаулық, бейбітшілік, сәттілік және амандық тілеймін. Жаңа жыл қуаныш, бақыт пен игі жақсылыққа толсын!,- деді Наталья Кан.
Жаңа жылдың басты символының биіктігі – 12 метр. Шырша гирляндалармен, сәндік элементтермен және ірі банттар арқылы безендірілді. «Сұңқар» стадионның іші де түрлі-түсті бояуға еніп, көңілді көтере түсті. Қала тұрғындары сондай-ақ төбешіктен сырғанап, мұз айдынында коньки теуіп, керемет әсерге бөлене алды.
Дина ӘБДІҒАЛИЕВА
