Мемлекет басшысы өзінің Жолдауында мемлекеттік органдардың қызмет көрсету сапасын арттыруды, процестерді автоматтандыруды және ашықтықты қамтамасыз етуді тапсырған болатын.

Бұл бағытта өткен жылы Мемлекеттік қызмет істері агенттігімен «Мемлекеттік қызметтер туралы» Заңына қашықтықтан бақылау жүргізу шараларына қатысты өзгерістер енгізілген болатын.

Өзгерістерге сәйкес Департамент қызмет көрсетуші мекемелердің ақпараттық жүйелері арқылы, қызмет алушылардың бұзылған құқықтарын қалпына келтіру бойынша қашықтықтан мониторинг шараларын жүргізеді.

Қашықтан мониторинг – бұл мемлекеттік қызметтердің сапасын бақылаудың жаңа, тиімді әдісі. Ол ақпараттық жүйелер арқылы жүзеге асырылады, мемлекеттік қызметтерді көрсету процесін қадағалап, заң бұзушылықтарды анықтауға мүмкіндік береді. Бұл жүйе арқылы қызмет көрсетуші органдардың жұмысы автоматты түрде бақыланады, яғни барлық процестер ашық әрі айқын болады.

Қашықтан мониторингтің негізгі мақсаты – мемлекеттік қызметтер көрсету саласындағы заң бұзушылықтарды анықтап, оларды алдын алу. Бұл жүйе қызмет көрсетуші органдардың жұмысын бақылап қана қоймай, сонымен қатар заңнаманың сақталуын қамтамасыз етеді. Әсіресе, мемлекеттік қызметтерді көрсету саласында жиі кездесетін мәселелердің алдын алу үшін өте маңызды құрал болып табылады.

Бақылау құралын енгізу нәтижесінде Департаментпен былтырғы жылы 1300-ден астам заң бұзушылықтар анықталды. Олардың басым бөлігі жер қатынастары, сәулет және қала құрылысы, ауыл шаруашылығы және әлеуметтік салалаларға тиесілі.

Талдау нәтижелері көрсеткендей, мемлекеттік қызметтерді көрсету барысында негізгі заң бұзушылықтар ретінде қызмет көрсетушінің жұмыс кестесінің бұзылуы, өтініштердің уақытылы тіркелмеуі және негізсіз бас тартулар болып отыр.

Анықталған бұзушылықтар бойынша Департаментпен 30-ден астам ұсыныс хат жолдап, мемлекеттік қызметтер көрсету саласындағы заңнаманы бұзған жауапты тұлғаларға тиісті тәртіптік шаралар қолданылды.

Мемлекеттік қызметтерді сапалы көрсету үшін ақпараттық жүйелер арқылы мониторинг жүргізу мәселесі Департаменттің ерекше бақылауында.

Қ. ТЕМИРЖАНОВ,

Мемлекеттік қызмет істері

агенттігінің Қарағанды облысы бойынша департаментінің

мемлекеттік қызметтер көрсету

басқармасының бас маманы