Абай атындағы жалпы білім беретін мектепте «Біртұтас тәрбие» бағдарламасы аясында «Жас сарбаз» үйірмесінің жетекшісі А.Ж. Бидахметовтің жетекшілігімен жоғары сынып оқушылары үшін Саран қаласындағы 44803 әскери бөлімінің  С-300 зениттік-зымырандық дивизион командирінің тәрбие және идеологиялық жұмыс жөніндегі орынбасары, майор Рамазан Бахтияровпен кездесу өтті.

Патриоттық-танымдық тақырыпта өрбіген шарада 44803 әскери бөлімінің  С-300 зениттік-зымырандық дивизион командирінің тәрбие және идеологиялық жұмыс жөніндегі орынбасары Рамазан Бахтияров өзінің жүріп өткен жолымен, өмірбаянынан сыр шертті.

 «Оқу — білім қазығы, адамның азығы. Оқу — өмірдің сәні, тіршіліктің шамы» деп қазақтың атақты ақыны Сәкен Сейфуллин айтпақшы, кездесуде жас буын өкілдеріне көкірегі ояу, көзі ашық болуы керектігі, білімнің маңыздылығы айтылды. Ұялы телефонның салдарына да тоқталды. Сондай-ақ, тарих пен салт-дәстүрге де аса мән берілді.

- Оқу-білім сарқылмайтын қазына. Оны Абай Құнанбайұлы да, Александр Суворов та айтып кеткен. Бала үшін ата-ана ғана шын уайымдайды. Қазір сіздерге сапалы білім алу маңызды, - деп атап өтті  майор Рамазан Бахтияров.

Кездесу аясында тарихы деректерге сүйене отырып жасалған, екінші дүниежүзілік соғыстағы ірі шайқастардың бірі – Мәскеу түбіндегі шайқасқа, 28 панфиловшыларға арналған диорама назарға ұсынылды. 

- Біз айына бір рет болсын балалармен кездесіп тұрамыз. Қарағанды, Теміртау, Саран қалаларындағы, Ақтас кентіндегі білім ұйымдарына барып тұрамыз. Сұхбат өткіземіз, - деп толықтырды Рамазан Бахтияров.

Шарада оқушылар белсенділігін көрсетіп, сауалдарын қойып отырды. 

Дина ӘБДІҒАЛИЕВА