Ұлыстың ұлы күні қарсаңында №17 мектеп-гимназиясының оқушылары робототехникадан Түркиядағы ең танымал Жерорта теңізі курорты – Анталияға квота ұтып алды.

15-16 наурыз күндері аралығында Астана қаласында орналасқан Назарбаев Университетiнде «Астана дарыны» дарынды балалар мен талантты жастарды анықтау және қолдау орталығы «AZ GROUP LLC» білім беру компаниясымен бірлесе отырып «Fibonacci International Robot Olympiad» халықаралық олимпиадасының роботехникадан республикалық кезеңі өтті. Оған қалалық білім бөліміне қарасты №17 мектеп-гимназияның «RSSaran jr» командасы қатысты. Жерлестеріміз 650 команда ішінен суырылып шығып, кезекті жетістігімен қуантты.

- Республикалық олимпиадада біздің командамыздың мүшелері: Антон Евсеев пен Тимур Каримов «Footbootlegoleague» атты спорттық робототехника санатынан Турцияның Анталиясында өтетін халықаралық чемпионатқа қатысуға лицензия жеңіп алды. Біз көптеген қиындықтардан өтіп, мықты қарсыластармен бетпе-бет кездестік. Тартысты өтті десем де болады. Біздің жігіттер жеңіп қана қоймай, нағыз командалық рухты, табандылық пен тапқырлықты көрсетті. Мен олардың әрқайсысымен мақтанамын!, - деді №17 мектеп-гимназияның информатика мен робототехника мұғалімі Асель Акшалакова.

Жаза кетейік, таяуда ғана №17 мектеп-гимназияның оқушыларынан құралған «X-forsе» және «RoboStarSaran jr» командалары робототехникадан өткен халықаралық Aзия жарысынан  жүлдемен оралған. Өздерінің қабілеттерін көрсете білген ойы ұшқыр, дарынды жастарды кезекті бағындырған белесімен құттықтаймыз!

Дина ӘБДІҒАЛИЕВА