Тіл –  мемлекеттің тұғырлы тірегі, халықтың рухани байлығы, өткені мен болашағының айқын көрінісі. Ана тілінің қадір – қасиетін біле білген халқымыз оны ұлттың рухына, қазына байлығына балайды. Себебі, тіл  –  халықтың жаны, сәні, тұтастай   кескін – келбеті, ұлттық болмысы.

Тәуелсіздікті алғаннан бері тіл саясаты қарқынды жүргізілуде. Мемлекеттік тілдің  қолданылу  аясын  кеңейту  мен тілге деген құрметті арттыру мақсатында  көптеген мемлекеттік бағдарламалар мен іс – шаралар  ұйымдастырылуда. Нәтижелері де аз емес.

Ана тіліміз арқылы ғана біз халқымызды, Отанымызды танып білеміз. Әр адамның азаматтық қасиеті – өз халқын, өзінің атамекенін қалай сүюімен, өз ана тілін қалай білуімен өлшенбек. «Өзге тілдің бәрін біл, өз тіліңді құрметте» демекші, әркімнің  тілге деген құрметін  өз анасына,  өз  ұлтына,  өз  Отанына  деген  құрметінен  білуге  болады. Өз ана тілін ұмытқан адам – өз хақының өткенінен де, болашағынан да қол үзеді. Осыны  қазақ  жастары түсінсе екен дейміз.

  Адамды мұратқа жеткізетін – ана тілі мен ата дәстүрі. Біздің осындай халықтық қасиетті мұрамыз – ана тіліміз – қазақ тілі.

  Ж.Джумашева,  

   Саран қаласының

полиция бөлімі