Экстремизм — радикалды саяси, діни немесе идеологиялық көзқарастарды ұстанып, зорлық-зомбылық пен заңсыз әрекеттерді ақтайтын сенімдер мен іс-қимылдар жүйесі. Ол ұлттық және халықаралық қауіпсіздікке төнетін аса маңызды қатер ретінде танылып отыр. Экстремистік идеялардың таралуы қоғамның тұрақтылығына, экономикалық дамуына және рухани бірліктің сақталуына елеулі кері әсерін тигізеді.

Қазіргі ақпараттық-цифрлық дәуірде экстремизмнің таралуына әлеуметтік желілердің ықпалы айрықша маңызға ие. Әлеуметтік платформалар миллиондаған адамды бір мезетте қамти алатын қуатты ақпараттық арнаға айналды. Бұл өз кезегінде радикалды идеялардың жылдам әрі кең ауқымда таралуына мүмкіндік беруде.

Террористік және радикалды ұйымдар әлеуметтік желілерді мақсатты аудиторияға насихат жүргізу, жаңа жақтастар тарту және өз идеологиясын кеңінен тарату құралы ретінде пайдаланады. Видео материалдар, жазбалар мен тікелей эфирлер арқылы олар бұрын қол жеткізу қиын болған аудиториямен байланыс орнатуға мүмкіндік алып отыр.

Әлеуметтік желілер, әсіресе жастар арасында, ең кең таралған коммуникация құралдарының бірі болып табылады. Дүниетанымы толық қалыптаспаған жастар радикалды идеологияларға психологиялық тұрғыдан әлдеқайда бейім келеді. Осы себепті экстремистік топтар жастарды өз қатарына тартуда интернет пен әлеуметтік желілерді белсенді түрде қолданады.

Әлеуметтік желілердегі экстремизммен күрес тек құқықтық немесе қылмыстық бақылаумен шектелмеуі тиіс. Бұл бағытта агрессивті және деструктивті контенттің алдын алу, медиа-сауаттылықты арттыру, азаматтардың ақпараттық қауіпсіздік мәдениетін қалыптастыру аса маңызды. Қоғамда сыни ойлау қабілетін дамыту арқылы радикалды идеяларға қарсы иммунитет қалыптастыруға болады.

Сондықтан әлеуметтік желілердің оң әлеуетін сақтай отырып, экстремистік идеологиялардың таралуына жол бермеу үшін жұртшылық, әсіресе, жастар арасында сыни ойлау қабілетін дамытып, қоғамда ақпараттық қауіпсіздік мәдениетін қалыптастыру — баршамыздың ортақ міндетіміз.

Г. Ханафина,

қалалық ақпараттық

топтың мүшесі